Filipino sa Malaysia tabangan sa gobiyerno

CEBU, Philippines -  Giseguro sa gobiyerno nga ipadayon sa Embahada sa Pilipinas ang pagtabang  sa mga Filipino sa Malaysia taliwala sa paggukod sa Malaysian government sa mga illegal immigrants.

Ang taho  sa Phil. Information  Agency (PIA)7 pinaagi  ni Elvira  Bongosa nagbutyag nga mao  kini  ang pasalig  nga  giluwatan  ni Raul Hernandez, ang tigpamaba sa Department of Foreign Affairs (DFA) kinsa  miingon nga kapin sa 5,000 ka Filipino ang gipaubos na sa voluntary repatriation program sulod sa tulo ka buwang deadline nga gihatag sa kagamhanan  sa Malaysia.

Miingon  si  Bongosa  nga  gisulod na sa mga Malaysian enforcement personnel ang nagkalain-laing mga dapit sa Malaysia  ug  gisusi   ang mga overstaying   nga  mga  illegal foreign workers.

Didto  nasuta,  sumala  ni Bongosa  nga halos 500 ka illegal immigrants na ang nadakpan sa Kuala Lumpur diin kadaghanan niini gikan sa Indonesia, Bangladesh ug India.

Hinuon  midugang  si Bongosa  nga ang  kagamhanan sa Pilipinas  miawhag  sa mga  Filipino  nga  tua  sa Malaysia  nga angay  silang  moparehistro  sa kagamhanan  sa  maong nasud  aron  dili na   isipong illegal  ang  ilang  pagpuyo  didto. (BANAT NEWS)