Mga langyaw dinhi ipa-monitor

CEBU, Philippines - Gihingusgan sa kapolisan sa lalawigan sa Sugbo ang pag-monitor sa mga langyaw nga mobisita ug mopuyo dinhi human sa pagkasikop ni Delcon Tamayose,  usa  ka Brazilian   national  nga nakuhaan og drugas ug armas sa dakbayan sa Danao sa miaging adlaw.  Ang hepe sa Police Intelligence Branch Supt. Rodolfo Albotra Jr. miingon nga ilang monitoron ang mga kalihokan sa mga langyaw nga ania  sa lalawigan. Dugang pa ni Albotra nga gimandoan na siya sa hepe sa Cebu Provincial Police Office Sr. Supt. Noel Gillamac nga monitoron ang mga langyaw ug susihon kun wala  ba  kini malambigit  sa mga organized crime group.  

Miingon  si Albotra  nga gimandoan siya  ni Gillamac  sa pagsusi sa background ni Tamayose ug sa posibling kalambigitan niini sa mga organized crime group. 

Gani  nakig-alayon  na  sila  karon  sa Bureau of Immigration (BI)  sa  pagpahigayon  og  background investigation sa  maong  Brazilian national ug lakip  usab  nga  gisusi  nila  ang record  niini  sa  Interpol Philippine Center for Trans-national Crime,” dugang ni Albotra. Giangkon ni Tamayose nga iya ang nubain, shabu ug kalibre .22 nga  revolver, apan gihimakak niya nga iya ang usa ka semi automatic rifle ug ang tulo ka rifle grenade  nga  nasakmit  sa kapolisan.

Gitun-an usab sa kapolisan sa dakbayan sa Danao ang pagpasaka og laing kaso sa suspetsado tungod sa pagtinir niini og rubber stamp nga iya untang gamiton sa pagpeke sa extension sa iyang pag-estar sa Pilipinas.  Nasikop si Tamayose human makadawat og alarma ang kapolisan sa dakbayan sa Danao kalabot sa usa ka armadong tawo nga didto padulong sa Dry Dock compound sa barangay Dungoan sa dakbayan sa Danao sa miaging  adlaw. (BANAT NEWS)