Tugnaw mipatay’g 30 ka baka

CEBU, Philippines - Mikabat na sa 30 ka binuhing baka ug unom ka lainlaing matang sa kahayopan ang nangamatay sa kabukirang barangay sa dakbayan sa Sugbo tungod sa grabeng katugnaw.

Ang ubang  nagtinga na  sa kaluya gitiwasan  sa  pag-ihaw  ug  gibaligya  sa barato nga  presyo  matag  kilo.          

Ang report sa Cebu City Agriculture Office nga gipangulohan ni Agriculturist Julito Baclayon nagkanayon nga gibana-bana nila nga miabot na og P11.5 milyones ang kadaut sa kahayopan ug mga tanom.           Matud ni Baclayon nga sa Barangay Lusaran, 10 ka baka ang nangamatay; duha sa Barangay Adlaon; 12 sa Barangay Tagbao ug unom ‘sab sa Barangay Sudlon II.           Gawas sa mga binuhi nga baka usa ka kabaw ug  usa  ka  kanding ang nangamatay ‘sab didto sa Barangay Adlaon, usa ka kanding ug karnero sa Barangay Tagbao ug usa ka baktin sa Barangay Taptap.           Dunay report nga may kabayo ‘sab nga namatay sa usa ka barangay sa kabukiran sa dakbayan sa Sugbo apan ang mao nga report wala pa kini moabut sa City Agriculture Office.           Si Baclayon miingon nga duna ‘say mga tanom apil ang mga buwak nga nangamatay tungod sa kabugnaw.          

Apan si Mayor Michael Rama miingon nga nagduda siya nga ang mao nga mga nangamatay’ng hayop walay maayong panglawas nga nagpasabot nga dunay posibilidad nga kini mga niwang ug daut mao nga wala makaagwanta sa kabugnaw.            Ang weather bureau miingon nga diha’y higayon nga ang kabugnawon miabot og 27 degrees celsius nga makapakuray na sa mga tawo. – (FREEMAN)