Gipadamgo sa amahan nga gipatay

CEBU, Philippines - Baynte-tres anyos nga dalaga sa dakbayan sa Lapu-Lapu nangangkon nga gipadamgo sa iyang na-missing nga amahan kung asa kini posibleng makaplagan.

Apan dihang ilang nakit-an, dunay nagtaop nga kutsilyo sa liog sa  patay’ng lawas sa amahan nga nagsugod na og kadugta diha sa kalibonan sa luyo nga bahin sa Mutual Homes Subdivision sa barangay Pajac, dakbayan sa Lapu-Lapu alas 12:30 kagahapon sa udto.

Ang namatay giila ni PO2 Winston Ybañez sa Homicide Section sa kapolisan sa Lapu-Lapu City Police Office (LLCPO) nga mao si Ruben Alvacenia Romera, 49, walay trabaho ug taga sitio Langob sa barangay Poblacion sa maong dakbayan.

Matud pa ni Ybañez nga ang anak sa biktima nga si Mary Jane Romera, 23, mitug-an nga alas- 6 pasado niadtong Huwebes sa gabii adunay lima ka mga lalaki nga wala nila mailhi nga miadto sa ilang panimalay.

Nagtuo ang anak nga mga kaila kini sa iyang amahan kay mikuyog man kini dihang gidala nga manglakaw sila, apan mao na kadto ang kataposang higayon nga nakita niyang buhi ang amahan.

Ang pamilya sa biktima midangop sa Presinto 3 aron magpatabang pagpangita niini nianang adlaw nga Biyernes apan wala kini makit-i.

Apan Lunes sa gabii, samtang siya natulog giingong gipadamgo siya sa iyang amahan bahin sa usa ka dapit nga dunay kalibonan kay matud pa didto kini makit-an.

Kagahapon sa buntag, wala maglangay si Mary Jane ug gipahibalo dayon ang iyang damgo ngadto sa iyang mga kabanay ug inabagan sa ilang mga silingan ilang gisubay ang mga libon nga lugar sa barangay Pajac ug didto ilang nakit-an ang amahan niini apan patay na.

Nagtuo si Ybañez nga patay nang daan ang biktima dihang gilabay sa maong dapit. Wala pa sila’y nakuhang lead kung si kinsa ang maong mga lalaki ug kung unsay motibo sa pagpatay sa biktima. (BANAT NEWS)