Mga dumuduong sa Sinulog mireklamo kay way kasilyas

CEBU, Philippines - Daghan kaayo ang mga nanan-aw sa Sinulog Grand Parade nga miabot og 3.5 milyones apan nagkuwang ang mga pansayan kon mga portable toilets nga gipamutang sa kadalanan.

Kini maoy obserbasyon ni Robert Lim Joseph, pangulo sa National Association of Independent Travel Agencies (NAITAS), kinsa guest sa 888 News Forum sa Marco Polo Plaza kagahapon.

Nangutana karon si Joseph kung giunsa paggasto sa Sinulog Foundation Inc. ang minilyon nga kita niini gikan sa daghang mga bisita nga gipabayad sa ilang pagsaksi sa kalihukan.

Matud pa niya nagsugwak ang mga nipuyo sa mga dagkung hotels sa dakbayan sa Sugbo gani pipila ka mga condominiums ang gihimo na nga kasamtangang hotels aron mapuy-an sa mga turista.

Sumala pa niya nga dili siya maka-imagine nga tibouk adlaw nga nisaksi sa kalihukan ang mga bisita apan wala kahibawo kung asa nga pansayan moadto sa ilang panginahanglan.

Nanghinaut karon si Joseph nga may kausaban nga himuon sa sunod nga Sinulog base sa obserbasyon sa mga turista.

Hinoon matud pa ni Joseph nga nindot nga natagbaw gyud ang mga turista sa kinatibuk-ang kalampusan sa Sinulog bisan sa nangaging mga kalamidad. Sa iyang bahin, si Mayor Michael Rama nanghinaut nga adunay mga magpapatigayon nga mo-invest  alang sa pagbutang og mga nindot nga mga pansayan sa daplin sa mga karsada sa dakbayan sa Sugbo.

Matud ni Rama nga dako kaayo ang panginahanglan nga magbutang g’yud og mga comfort rooms daplin sa mga karsada kay adunay ordinansa ang dakbayan sa Sugbo nga mosilot sa mga tawo nga masakpang magpataka lang og pangihi sa publiko nga mga dapit. Si Rama miingon nga ang mga pansayan nga mugnaon kinahanglan nga dali ra nga mabalhin sa lainlaing lugar ug dili kini permanente nga tukoron.

Nagtoo si Rama nga dili alkanse ang mga magpapatigayon nga motukod og mga pansayan daplin sa kadalanan. Hinoon, bisan og gusto si Mayor Rama niini apan ang mao nga ideya magkinahanglan pa nga aprobahan sa City Council.

Bisan pa sa awhag sa mayor nga ang mga balay-patigayon mopagamit sa ilang mga pansayan apan wala kini tumana sa mga tag-iya og negosyo. (BANAT NEWS)