Kawani sa obo,tulo ka tawo nadakpan sa buybust sa nbi

CEBU, Philippines - Nadakpan sa National Bureau of Investigation (NBI)-7 niadtong adlaw nga Biyernes ang usa ka kawani sa gobiyerno ug tulo ka tawo tungod sa kalapasan sa Republic Act 9165 o Comprehensive Dangerous Drugs Act.

Sumala pa ni Atty. Renan Oliva,  ang nadakpan sa buybust operation mao sila si Ricardo Cantillas, residente sa Tanke-1, Naga City, Cebu;  Zosimo Abaquita sa Sitio Mohon, Langtad, Naga City; Ariel Sarusal taga Sitio Mohon; ug Arnette Sarusal taga Nangkaan, Sangat, San Fernando.

“That at around 5:00 p.m. of January 17, 2014, NBI Operatives conducted a buy bust operation at the residence of Abaquita. That seized and confiscated from Abaquita was a medium sized heat sealed plastic containing white crystalline substance believed to be shabu,” sumala pa sa joint affidavit sa NBI.

Gawas sa medium size heat-sealed plastic sachet  nga may sud nga shabu gikan kang Abaquita, nabawi usab sa ahente nga si Reynaldo Villordon Jr., ang buy bust money nga P500.

Dugang nakuha sa operasyon ang 20 ka glass tooters, walo ka medium size heat-sealed plastic nga may sud nga gituohang shabu, ug mga drug paraphernalia gikan ni Abaquita.

Sumala pa sa NBI, si Cantillas, usa ka field inspector sa Office of the Building Official (OBO), sa Naga City ug maoy gidudahan sa NBI nga tig-suplay og illegal drugs kang Abaquita.

“An incidental search on his (Cantillas) vehicle yielded plastic sachets containing traces of white crystalline substance believed to be shabu, unused plastics for packing of shabu, needle used for breaking shabu, improvised tooter, small notebook containing lists of credits and payments involving drug transaction,” dugang pa sa affidavit sa NBI.

Laing nasakmit sa NBI gikan ni Cantillas mao ang usa ka unlicensed 9mm pistol nga may serial no. 127638, usa ka 9mm magazine, walo ka buhing bala ug usa ka expired firearms identification cards. Matud pa nga misuway unta og sukol si Cantillas pinaagi sa pagbunot sa iyang armas apan nadisarmahan sa mga operatiba.

Matud pa sa NBI sila si Arnette ug Ariel nadakpan samtang nagsuyop og shabu diha sa balay ni Abaquita.

Si Abaquita miangkon sa mga tigbalita nga namaligya siya og shabu apan ginagmay lang. Matud niya namaligya siya isip panginabuhian, kaniadto supervisor siya sa mga pump boy sa usa ka gasolinahan apan nag-AWOL siya dihang milarga sila sa iyang asawa ngadto sa Manila.

Samtang si Cantillas mihimakak nga namaligya siya og shabu ug mihapit lang siya sa dapit tungod kay dunay mga “chicks.”   Samtang sila si Arnette ug Ariel mihimakak nga nanuyop sila didto.

Ang mga dinakpan gipasakaan na og kaso sa piskalya sa siyudad sa Naga kagahapon. (/EIM)(BANAT NEWS)