Augmentation force sa Sinulog nangapasmo

CEBU, Philippines - Nanguli na ang kapolisan sa ilang mga mother units nga gi-augment sa kapolisan sa dakbayan sa Sugbo atol sa Sinulog.

Apan pipila kanila nakasinati og mapait nga kasinatian atol sa ilang deployment sa Sinulog kay dunay uban kanila ang nangreklamo nga nangapasmo kay wala maabti sa ilang pagkaon.

Samtang ang mga kadete sa nagkadaiyang eskuylahan mireklamo usab nga   napasaran og kaon kay bisan oras tingpangaon wala sila mobiya aron makontrol ang mga tawo.

Apan ang hepe sa Police Community Relations nga si Chief Inspector Enrique Belciña, miingon nga duna sila’y nahatag nga pagkaon apan dugay lang gyud kini nga naabot.

Sumala pa nga naglisod paghatag ang nagdala sa pagkaon sa kapolisan tungod sa kabaga sa duot sa katawhan niadtong Domingo.

Si Supt. Reycel Carmelo Dayon ang Deputy City Director for Operations miingon nga mas daghan ang tawo sa hapon kompara sa buntag niadtong Domingo.

Matud pa ni Dayon nga siya mismo nakabantay nga mas nidaghan ang tawo sa hapon padulong na sa gabii ug daghan ang nagpabadlong nga mga batan-on sa maong lugar.

Apan giklaro niini nga wala man hinuoy mga dagkong panghitabo sama sa lamok-lamok sa maong lugar.

Miingon si Dayon nga mapasalamaton siya tungod kay kalmado ra ang mga tawo niadtong higayona. (/EIM)(BANAT NEWS)