Dunay klase ang Cebu City karong adlawa

CEBU, Philippines - Wala suspensoha ang klase sa dakbayan sa Sugbo karong adlawa, usa ka adlaw human ang dakong Sinulog Festival.

Sukwahi kini sa naandan diin hatagan og higayon ang mga estudyante nga makapahuway og usa ka adlaw human ang grand parade alang sa kapistahan ni Sr. Sto. Niño.

Matud ni Cebu City Mayor Michael Rama, dili niya mahimong ideklarar nga walay klase tungod kay wala’y rekomendasyon gikan sa Department of Education (DepEd) ingon man gikan sa konseho sa dakbayan.

“I cannot declare nga wala’y klase ugma. It is up to DepEd. They are the ones to give a recommendation," matud ni Rama. Apan dugang niya, dili na makapugong ang mayor kung ang mga pribadong tunghaan modeklarar nga wala’y klase.

“It (suspension) is the discretion of DepEd, schools, colleges, universities, whether private or public, to suspend classes. Not my call,” si Rama mipasabot.

Si DepEd Cebu City Schools Division  Superintendent Rhea Mar Angtud namahayag nga kadto rang mga tunghaan nga misalmot sa grand parade lamang ang tugutan nga dili magklase.

“Duna tay klase (karon). Twelve schools ra man ang involved sa 137 ka schools. Ato lang gitagaan og rest day ang involved," matud ni Angtud.

Ang maong mga eskuylahan mao ang Inayawan Elementary School, Ramon Duterte Memorial National High School, Don Sergio Osmeña Memorial National High School, Tejero Night High School, Alaska Elementary School, Apas National High School, Talamban Elementary School, Quiot Elementary School, Banilad Elementary School, Abellana National School, Don Carlos Gothong Elementary School, ug Tisa Elementary School.

Kini nga mga eskwelahan usab misalmot sa Sinulog sa Kabataan sa Dakbayan niadtong Enero 12.

Migawas nga mananaug sa Sinulog sa Kabataan mao ang Abellana National School  alang sa high school category samtang ang Banilad Elementary School ang nakadaug alang sa elementary category. (BANAT NEWS)