Kapolisan sa Talisay mibantay usab sa Sinulog

CEBU, Philippines - Ang kapolisan sa dakbayan sa Talisay  misalmot sa siguridad sa pagsaulog sa Sinulog Festival.

Si Senior Inspector Richard Gadingan, deputy chief  sa Talisay City Police Station (TCPS)  nga nahinabi sa Banat News kagahapon mibutyag nga gawas nga adunay mga polis gikan sa TCPS nga gipabantay  usab sa kalihukan  sa Sinulog,  nagpahigayon  usab  sila  og check point  sa Cebu South Coastal Road ug sa barangay Bulacao, Talisay.

Gibutyag ni Gadingan nga lakip sila sa security plan sa provincial headquarter alang sa nahisgutang kasaulogan.

Matud ni Gadingan nga ang mga biyahedor gikan sa habagatan paingon  sa dakbayan sa Sugbo ug vice  versa moagi  gyud  sa check point. Gipasabot ni Gadingan nga usa  kini  sa ilang  paagi  sa  pagmintenar  sa kahusay ug kalinaw sa Sinulog.

Midugang  si  Gadingan  nga   ang mga badlungon nga mupaingon  sa dakbayan sa Sugbo mababagan na nila  ug kadtong mga  kriminal nga mudagan paingon sa habagatan  ila  usab  nga masita pinaagi  sa maong  check          point.

Apan matud ni Gadingan nga wala sila’y nadawat nga report bahin  sa  mga badlungon nga gikan sa laing dapit nga nagpuyo karon sa Talisay.

Hinuon bisan pa niini matud sa deputy sa TCPS nga dili sila  mukompiyansa ug gipahugtan pa nila ang ilang intelligence network.

Sa laing bahin, kagahapon ang mga PUJ, usa  niini ang   may rotang 09C didto  ra kutob sa  national highway habig sa Salazar Institute of Technology (SIT)  kay dili na makalahos sa Colon tungod sa prosesyon.

Pasado alas 12:00 sa udto ang mga pasahero gikan sa habagatan naglakaw na gikan sa SIT paingon  sa Colon aron  musalmot  sa prosesyon.  (BANAT NEWS)