Balay nadat-oga’g bato, duha ka managsuon patay ug usa angol

CEBU, Philippines - Duha ka menor de edad ang patay ug usa angol human natagakan ang ilang panimalay og dakong bato diha sa sitio Lusaron sa barangay San Juan lungsod sa Tuburan alas 1:30 sa udto sa miaging adlaw.   Ang mga biktima naila nga sila si Jose Arias Jr., 14, kinsa dead on the spot human masentro sa bato ug ang 3-anyos niining manghod nga si Jonabel kinsa nadala pa sa tambalanan apan gideklara gihapon nga dead on arrival.

Samtang nasamdan ug anaa sa kritikal nga kahimtang ang laing igsuon sa duha nga si Jundel Arias, 5, human madat-ugan sa bato ug mga bahin sa balay.         

Samtang Naluwas usab ang kinamaguwangan nga anak nga si Jobel Arias ug ang kinamanghuran niining igsuon nga bag-o  lang gipanganak.  Miresponde sa nahitabo sila si Sr. Insp. William Homoc, PO3 Pablo Arnoco, PO1 Alfitche Mangaron, PO1 Jerome Pesidas, SFO1 Joel Pador ug FO1 Rochele Aline Bravo sa Tuburan Police Station ug sa Bureau of Fire Protection sa maong lungsod.

Ang balay sa managtiayong Jose ug Maribel Arias nahimutang sa ubos nga bahin sa usa ka bung-aw nga makita sa ibabaw ang mga dagkong bato.Si PO1 Joseph Bejer sa Tuburan Police Station nahinabi sa Banat News, nagkanayon nga ang hinungdan sa pagkatagak sa bato mao ang pagsige og bunok sa uwan sa nangaging mga adlaw. Sumala pa ni Bejer nga ang mga bata nangatulog nianang higayona ug ang inahan nanglaba sa gawas, samtang milakaw usab ang amahan sa mga bata.Matud pa nga natumong gyud sa gikatulgan sa mga bata ang maong bato hinungdan sa ilang kamatayon.

Ang Philippine Atmospheric Geophysical and Astronomical Services Administration (PAGASA) daan nang mipasidaan nga posibleng moresulta sa pagdahili sa mga yuta ug pagbaha ang pagpunay karon og bunok sa uwan tungod sa pagsulod sa bagyong Agaton ug ang pagsige og uwan dinala sa low pressure area nga gisamotan sa hanging amihan.  (BANAT NEWS)