Prayer sa Malacañang pangunahan ni PNoy

CEBU, Philippines - Pangunahan ni Presidente Benigno ‘Noynoy’ Aquino III sa Enero 20, Lunes ang National Day of Prayer and Solidarity nga adunay temang ‘One Nation in Prayer’.

Gibutyag  ni Elvira Bongosa  sa Philippine  Information Agency (PIA)7  nga  usa  ka yanong programa alang ning maong  katuyoan  ang ipahigayon  sa maong  adlaw nga adto  ipahigayon  sa Malacañang  nga dumalahon  ni Manila Archbishop Luis Cardinal Tagle.

Kini  agi  og pasalamat sa malampusong pagbangon sa nasud human naigo sa lain-laing kalamidad  gikan sa giyera sa Zamboanga, magnitude 7.2 nga linog sa Bohol ug ang labing kusog nga  bagyong Yolanda.

“Usa kini ka pag-ila sa katawhang Pilipinhon sa gahum sa Ginoo nga naggiya sa dungan natong panimpad  paingon sa mas hayag nga kaugmaon, matud pa ni Presidential Communications Operations Office (PCOO) Sec. Herminio “Sonny” Coloma Jr.

Dugang pa ni Coloma, nga gipaabot nga makighiusa sa Presidente sa Lunes ang mga tinugyanan sa mga apektadong komunidad sa giyera sa Zamboanga, linog sa Bohol ug sa bagyong Yolanda, lakip  na usab sa mga tinugyanan sa nagkalain-laing relihiyon sama ni Cardinal Tagle, Imam Ebra Moxair sa Imam Council sa Pilipinas, Komisyoner Zenaida Pawid sa National Commission of Indigenous Peoples, Isaias Samson sa Iglesia ni Cristo ug mga representante sa Philippine Council of Evangelical Churches.

Miingon si Coloma nga apil usab sa gi-imbitar sa Malacañang ang mga lider sa Kongreso, mga pangulo sa nagkalain-laing buhatan sa gobyerno ug mga tinugyanan sa civil society groups, apil na usab ang nagkalain-laing grupo sa pagtuo. (/WC)(BANAT NEWS)