Milayat sa Mactan Bridge
CEBU, Philippines - Grabeng kadaut nga naangkon sa kalawasan sa usa ka lalaki nga misulay unta og hikog pinaagi sa paglayat sa Mactan- Mandaue Bridge sa habig sa barangay Pajo, dakbayan sa Lapu-Lapu alas -11 pasado ang takna kagahapon sa buntag.
Si PO2 Jerson Aparito sa Homicide Section sa kapolisan sa maong dakbayan nagkanayon ang 38-anyos nga buot maghikog taga dalan Sabellano sa Punta Princesa dakbayan sa Sugbo.
Matud pa ni PO2 Aparito nga mipatong sa railings sa nahisgotang taytayan ang maong lalaki ug milayat apan adto kini mitugpa sa atop sa panimalay ni Amelia Semenia.
Nakuratan na lang ang banay’ng Semenia sa kalit nga paglagubo sa ilang atop ug pagkakita nila sa tawo nga way panimuot dali silang nanawag sa Emergency Rescue Unit Foundation (ERUF) ug maoy nagdala niini ngadto sa Lapu-Lapu City Hospital.
Naulian na sa maayong panimuot ang maong lalaki paglabay sa pipila ka gutlo nga pag-atiman sa mga doktor, sa pagsukit-sukit kaniya, pangalan lang niini ang iyang gibutyag ug kun pangutan-on motubag lang kini og “I don’t know! I don’t know!.†(/EIM)(BANAT NEWS)
- Latest
