Ambush! suspek napatay

CEBU, Philippines - Patay ang drayber sa usa ka negosyante human gibanhigan ang sakyanan nga ilang gisakyan apan ang mibanhig napatay usab diha sa barangay Kinasang-an sa dakbayan sa Sugbo  pasado alas 2:00 sa miaging gabii.

Ang drayber naila nga si Wolfrando Pagador, 47, drayber sa negosyante samtang namatay sab ang wa pa mailhing lalaki nga maoy mipusil sa drayber.

Samtang wala maunsa ang negosyante nga si Amor Pelenia, 52, ug si Angelo Alega luwan sa Mitsubishi Pajero.

Sumala pa ni Chief Insp. Romeo Santander ang hepe sa City Intelligence Branch sa Cebu City Police Office nga didto pusila sa suspetsado ang mga biktima duol sa balay niini.

Apan sumala pa ni Santander nga posibling napusilan ang maong suspetsado ni Alega hinungdan nga namatay kini. Sumala pa ni Santander nga wala na nila karon makita si Alega.

Dihang gipaulanan og bala sa suspetsado ang mga biktima duol sa gate sa Greyhound Subdivision, patay na ang drayber nga si Pagador pag-abot sa Miller Hospital tungod sa upat ka samad pinusilan niini.

Samtang ang wala mailhing gunman natikay-ang na diha sa dalan tungod sa mga samad pinusilan sa kalawasan. Giingong gibiyaan kini sa kauban nga drayber luwan sa usa ka motor.

Gitan-aw pa karon sa kapolisan ang posibling koneksyon sa kamatayon sa bana sa negosyante nga si Lando Pelenia nga gibanhigan usab duha ka tuig ang milabay. Lakip sa gisusi sa kapolisan ang anggulo sa negosyo sa lending ug pension houses sa mga Pelenia.  (BANAT NEWS)