Sinakong pebbles diha sa Talisay CH gikwestyon
CEBU, Philippines - Mga gipundo nga sinakong pebbles stones diha sa atubangan sa Talisay Ciy Hall gikwestyon sa mga magduawan sa maong buhatan kung kang kinsa ug kung para sa unsa.
Apan kagahapon sa pakighinabi sa mga tigbalita kang Mayor Johnny De los Reyes kini miangkon nga gikan kini sa Mindanao ug gipanag-iya sa usa ka pribadong negosyante nga iya usab higala. Ang mayor nagkanayon nga mihangyo kini kaniya nga anha lang una ibutang sa compound city hall ang maong mga pebbles stones apan dunay kontrata nga magbayad kini og P14,000 sa usa ka semana isip abang ngadto sa kagamhanan.
Hinuon matud pa sa mayor nga 7,000 kini ka sako apan gipahinay-hinay niya kini og hakot aron mabalhin ngadto sa laing lugar tungod kay milapas na ang gikasabutan nga usa ka semana. Wala hinuon ibutyag sa mayor ang ngalan sa maong negosyante.
Nunot niini, si Konsehal Antonio Bacaltos, Jr. chairman sa committee on environment sa konseho sa Talisay nga nahinabi sa Banat News nagkanayon nga nakadawat usab siya og report kabahin sa mga sinakong pebbles stones.
Matud ni Bacaltos nga magsusi unta siya niini ngadto sa buhatan sa mayor pagpiho kung dinakpan ba ang maong mga pebbles stone aron mabuhatan usab nila kini og tukmang lakang. (BANAT NEWS)
- Latest
