Pagparehistro sa fluvial procession way kapuslanan?

CEBU, Philippines - Walay kapuslanan ang pagpangrehistro sa mga sakyanang-pangdagat nga gihimo sa Coast Guard alang niadtong gusto nga moapil sa fluvial procession ugma sa buntag.

 Giangkon ni Acting Cebu Coast Guard commander Rodolfo Villajuan nga dili gyud nila mapugngan kadtong mga pump boat nga mokalit lang pagtumaw ug mosalmot sa fluvial procession gikan  sa kadagatan sa Lapu-Lapu.

Kapin lang sa 20 ka sakyanang-pangdagat ang nagparehistro nga mosalmot sa procession sa kadagatan sa imahen ni Santo Niño apan sama sa sagad mahitabo kadtong daghang mga pump boat nga wala marehestro moapil lang gihapon ug dili nila kapugngan.

Ang mga marshalls nga magsakay og speed boat dili makabadlong kun ang mga pump boat nga wala marehistro moapil nga walay pagtugot sa Coast Guard.

Ang pagrehistro sa mga moapil sa fluvial procession walay bayad ug gitumong lang aron nga mahan-ay ang mga sakyanang-pangdagat sa ilang mga pwesto ug dili mapiit ang mga gagmay kun moipon sa dagko nga mga seacraft.

Alas siete ugma sa buntag sugdan ang fluvial procession nga ang mag-una mao ang “Gallon” nga kargahan sa imahen ni Santo Niño nga dad-on sa Mandaue karong buntaga ug adto sa Saint Joseph Church sa Mandaue bilaran sa tibuok gabii.  (BANAT NEWS)