Akrho moapil sa Sinulog Grand Parade

CEBU, Philippines - Nangayo og tabang sa seguridad sa kapolisan ang adviser sa Alpha Kappa Rho tungod kay mosalmot ang maong fraternity sa Sinulog.

Sumala pa ni Richard Buscaino nga nahinabi sa mga tigbalita nga mihangyo sila ni Chief Insp. Romeo Santander ang hepe sa City Intelligence Branch sa Cebu City Police Office alang sa ilang security.

Matud pa ni Buscaino nga mosalmot sila sa float, higanti, ug puppet category karong Domingo.

Gitataw ni Buscaino nga dili susama sa milabay nga katuigan diin ang ilang grupo nalambigit sa kagubot tali sa Tau Gamma Phi fraternity, karon malinawon na ang ilang duha ka pundok.

Dugang ni Buscaino nga upat na ka tuig nga sila misalmot sa Sinulog walay kagubot nga nahitabo niadtong panahona.

Apan bisan pa man niini naniguro lang sila nga walay dautang mahitabo.  (BANAT NEWS)