DEPP mikondina sa death threat

CEBU, Philippines - Gikondinar sa mga sakop sa Defense PNP Press Core (DEPP) ang death threat nga nadawat sa reporter sa TV5, human mogawas ang iyang special report sa maong estasyon.

Si Jinky Bargio, sa TV5  mibutyag  kagahapon  nga  adunay mga opisyal sa kapolisan nga protector sa mga drug lord ug gambling lord sa Sugbo ug magdawatan og protection money.

Apan wala hinuon siya mosulti kun kinsa ang maong mga opisyal.

Sumala pa sa Presidente sa DEPP nga si Chito Aragon nga ilang gikondina  ang maong tinalawan nga buhat tungod kay igo lang naghimo sa iyang trabaho si Bargio.

Sumala ni Aragon nga mipalabang og manifesto ang DEPP sa pagkondina sa maong buhat ug sa pagsuporta sa miyembro niini nga si Bargio.

Gihangyo usab sa DEPP nga imbistigahan ang responsabli sa pagpanghulga sa TV5 reporter, sumala pa ni Aragon.

Sa ilang bahin gihangop sa kapolisan ang plano sa Ombudsman nga ipailawom sila sa lifestyle check.

Sumala pa sa hepe sa Regional Investigation and Detective Management Division, Sr. Supt. Armando Radoc nga welcome ang si bisan kinsang polis  kun sila himoan   og lifestyle check.

Dugang pa ni Radoc nga matag tuig ila man  usab nga isumiter ang ilang Statement of Assets Liabilities and Networth (SALN) ug puwede kining utingkayon ni bisan kinsa.

Ang Deputy City Director for Operations sa Cebu City Police Office mihangop usab sa maong lakang sa Ombudsman aron makita kun gisuweldoan ba gyud og tarong ang kapolisan

“Wa nay problema sa amoa, mas maayo na aron makita kung well compensated ang mga polis o di ba,” dugang ni Banzon. (BANAT NEWS)