Kapolisan blangko sa mipatay sa construction worker

CEBU, Philippines - Nagpabiling blangko ang kapolisan sa pag-ila sa mamumuno  ni Jomar Hortelano, usa ka  construction  worker, nga napalgang patay sa daplin sa dalan sa New Road sa sitio Angasil, barangay Mactan, dakbayan sa Lapu-Lapu  sa  miaging buntag.

Si PO3 Lydo Pinos sa homicide section  sa kapolisan  sa Lapu-Lapu mitataw  nga gipatay gayud ang biktima base  sa kadaot  sa dagway  niini.

Dugang pa niya nga nakabaton og samad sa nawong ang biktima ug nalumping usab ang pikas nga bahin niini nga gituohan nga gidunggab ug gidakdakan usab  og gahi nga butang.

Gitataw niya nga  wala   pa nila matino ang samad pinusilan sa biktima sanglit gipaabot pa nila ang autopsy  report sa medico legal sa PNP Crime Laboratory.

Ang   tulis maoy usa sa mga anggulo karon nga ilang gisubay  sanglit gawas nga gihuboan kini sa iyang short pant, nahanaw  usab ang pitaka niini  sa   bulsa nga may  sulod nga kuwarta.

Kahinumdoman nga  si Hortelano ug mga kaubang trabahante sa usa ka construction firm nga nagtrabaho og  usa  ka building sa barangay Mactan  gidapit  og birthday sa tag-iya sa canteen nga ilang kan-anan sa maong lugar. (BANAT NEWS)