Kong. Gullas ug Mayor Delos Reyes naglamanohay atol sa torneyo

CEBU, Philippines - Sa usa ka talagsaong talan-awon sa dakbayan sa Talisay, naglamanohay ug naghangpanay sila si First District Congressman Gerald Anthony "Samsam" Gulllas ug si Mayor Johnny “JVR” Delos Reyes sa pagbukas sa basketball tournament sa barangay Lagtang.

 Si delos Reyes maoy kaatbang sa apohan ni Samsam nga si kanhi kongresista Eduardo Gullas sa pagkamayor niadtong eleksyon sa Mayo sa miaging tuig nga gipildi niini sa gamay lang nga labaw.

Apan gipadaplin sa kongresista ang panagribal nila sa politika alang sa maong torneyo diin siya ang usa sa mga pinasidunggang dinapit.

Si Samsam sayo nga naabot sa complex inubanan ni Bise-Gobernador Agnes Magpale ug paglabay og usa ka oras miabot ang mayor kinsa giimbitar usab ni Kapitan Ferdinand Bas sa Lagtang.

"It was a good start with us," matud pa ni Samsam nga gipangutana sa mga reporter kagahapon.

Matud pa nga sukad niadtong Mayo sa miaging tuig wa pa gyud magkaatubangay ang duha.

Si De los Reyes miimbitar sa batan-ong kongresista nga kanunayon na nila kini nga mag-uban sa mga okasyon.

“What’s best for now is to set aside politics and do our job as public servants for the betterment of  Talisay," sumala pa ni Samsam. (BANAT NEWS)