3,500 debotos gipaabot moistar sa Devotee City

CEBU, Philippines - Ang mga opisyal sa dakbayan sa Sugbo nagpaabot nga 3,500 ka devotees ni Senyor Santo Niño gikan sa lagyo nga mga dapit ang moistar sa gitukod nila nga Devotee City duol sa Compania Maritima.

Si Mayor Michael Rama miingon nga karong Biyernes magsugod na pagdawat ang Devotee City og mga ‘lodgers’ gikan sa lagyo nga mga dapit.

Ang pagmugna og Devotee City gitumong aron kadtong mga tawo nga gikan sa lagyo nga dapit sa nasud ug walay kwarta nga ikabayad og hotel/lodging houses ingon man walay mga paryente nga kaabtan dinhi mahimo nga anha sila moestar.

Gisugdan sa dakbayan sa Sugbo ang pagpahigayon og Devotee City kapin sa napulo ka tuig na ang milabay pinaagi ni kanhi konsehal Fe Mantua Ruiz nga maoy nakahuna-huna sa maong proyekto.

Sa miaging tuig 110 lang ka container vans nga gipahuwam sa 2GO Shipping ang gipagamit nga libre sa dakbayan apan karong tuiga gihimo na nga 130 ka vans. Kadtong gusto nga moestar sa Devotee City sugod karong Biyernes mopresentar lang sa ilang mga tiket sa barko o kaha tiket sa bus nga ilang gisakyan. (BANAT NEWS)