Mga nasunog sa Warwick di pa pabalayon

CEBU, Philippines - Gidid-an pa ni Mayor Michael Rama ang mga biktima sa sunog sa Warwick Barracks Market sa Barangay Ermita nga motukod pagbalik og tindahan ug kabalayan  sa maong  lugar  nga  nasunog  niadtong Sabado.

Gimandoan ni Rama sila si Acting City Engineer Jose Marie Poblete ug Market Administrator Raquel Arce nga lihokon ang pag-asikaso aron mahawanan ang maong dapit ug mapahigayon ang re-blocking. Gitan-aw ni Rama ang karaang hulagway nga kuha kaniadtong 1920 nga nagpakita nga ang Warwick Barracks kaniadto hawan kaayo apil ang Freedom Park, ang merkado sa unahan nga bahin sa dapit nga nasunogan.

Matud ni Rama nga dili siya motugot nga ang Warwick Barracks gamiton pagbalik isip residential area kay ang maong lugar gitagana isip merkado.

Daghan sa mga naninda kaniadto ang mitukod og balay sa dapit nga ilang gitindahan.

Ang mao nga mga tindera nga mitukod og balay sa Warwick Barracks market wala na usab mobayad sa ilang obligasyon nga arkabala.

Ang rekord sa Market Operations Division nagpakita nga ang Warwick Barracks maoy labing gamay og koleksyon sa siyam ka satellite market dinhi sa dakbayan.

Si Vice Mayor Edgardo Labella miingon nga daghang mga biktima sa sunog sa Warwick Barracks market ang pabor nga himoon ang re-blocking aron nga managsama ang gidak-on sa matag stall ug walay makapamentaha.

Nasayran nga adunay uban sa mga nag-ukopar kaniadto sa Warwick Barracks market nga dagku og pwesto hinungdan nga gubot kaayo ang mao nga lugar kay wala magkatukma ang mga agianan.

Si Mayor Rama miingon nga pahatagan gihapon niya og hinabang-salapi ang kapin sa 100 ka pamilya nga mga nasunogan apan dili sila hatagan og construction materials. (/WC)(BANAT NEWS)