PNoy miawhag hiusahan ang National Day of Prayer

CEBU, Philippines - Giawhag ni Presidente Benigno ‘Noynoy’ Aquino III ang publiko nga makighiusa sa National Day of Prayer and Solidarity sa umaabot   nga Enero 20 alang  sa  mga   trahedya  sa nasud. Matud pa ni Elvira Bongosa sa Philippine Information Agency (PIA)7  nga  si Presidential Communications Operations Office (PCOO) Sec. Herminio Coloma Jr., misaysay  nga pangunahan mismo ni Presidente Aquino ang maong kalihokan pinaagi sa yanong programa nga ipahigayon sa Malacañang  nga  may  tema  nga “One Nation in Prayer”.

Sumala  ni  Bongosa  nga salmotan usab kini sa mga opisyal sa gobyerno ug mga tinugyanan sa nagkalain-laing sektor. Dugang pa  ni  Bongosa nga  si Coloma mipasabot  nga ang ‘Usa  ka Nasud, Usa ka Panalangin’ himuon isip pag-ila sa katawhang Filipinhon sa gahum sa Ginoo nga naggiya sa atong padulngan paingon sa mas hayag nga kaugmaon.

Miingon  si  Bongosa  nga una niini, gibutyag sa Presidente sa iyang pamahayag sa Vin d’Honneur nga gipahigayon niadtong Enero 10 sa Malacañang, bahin  sa  pagdayeg sa mga bisitang langyaw sa kalig-on sa atong nasud. Kini matud pa sa Presidente nga bunga sa lig-on nga pagsalig sa mga Filipino nga mas gipalig-on pa atubangan sa mga pagsuway.

Midugang  si  Bongosa  nga sa niaging tuig, sunud-sunod nga katalagman ang naagian sa nasud sama sa magnitude 7.2 nga linog sa Bohol ug Cebu ug ang super typhoon “Yolanda” sa Visayas nga labing kusog  sa kasaysayan.(/WC) (BANAT NEWS)