Nangawat og kable nakuryentihan, patay
CEBU, Philippines - Usa ka lalaki nga gidudahang mangawat unta sa kable sa poste sa usa ka telecommunications company ang nakuryentihan ug namatay diha sa sa barangay Poblacion lungsod sa San Remegio alas 11:30 sa gabii sa miaging adlaw.
Ang lalaki naila nga si Christopher Cotejo, 26, molupyo sa naasoy’ng lugar.
Base sa imbestigasyon nga gihimo ni Sr. Insp. Alexander Ancao-cop sa San Remegio Police Station nasuta nga nakuryentihan si Cotejo samtang nangawat sa kable nga bronse sa maong poste. Ang mga kauban ni Cotejo sa pagpangawat mao sila si Errol Cabatingan alyas Tiboy, 21. Si Nicolas Bantillan alyas kulas, 40 ug si Lowell Cabatingan alyas Lotlot, 38, pulos molupyo sa maong lugar ug nadakpan sa follow-up operation.
Natanggong na karon sa San Remegio Police Station ang mga kawatan alang sa dugang nga imbestigasyon. Nasakmit usab sa kapolisan ang gigamit nila sa pagpangawat sama sa gabas na puthaw ug pliers.
Samtang si Cotejo daling gidala sa tambalanan apan gideklara na kining dead on arrival sa miatiman nga doctor. (BANAT NEWS)
- Latest
