Duha naangol pagkalimbuwad sa pickup

CEBU, Philippines -Duha ang samdan sa dihang nalimbuwad ang sakyanan nga ilang gisakyan human mahulog sa kanal sa Sitio Tan-awan, Barangay Guadalupe dakbayan sa Carcar kagahapon sa buntag.Si Roman del Pilar, 18, ug ang kapuyo niini nga si Angelica Soterio, 18, pulos taga C. Padilla dakbayan sa Sugbo, pulos nakaangkon og samad sa nagkadaiyang parte sa ilang lawas sa dihang ang gisakyan nila nga pick up type Mitsubishi Estrada nadisgrasya.

Si Del Pilar ug Soterio daling gidala sa Carcar Provincial Hospital.

Ang mga biktima paingon unta sa lungsod sa Ronda gikan sa dakbayan sa Sugbo sa dihang nahitabo ang maong insidente matud ni PO1 Dennis Cabajar, investigator.

Ang sakyanan adunay plakang PTQ 629 nga gimaneho sa drayber niini nga si Ian Asparo, 37, taga Barangay Umapad, Mandaue City.

Matud ni Cabajar nga nawagtangan og kontrol sa maong sakyanan si Asparo sa dihang nagdagan sila sa kurbadahong dalan sa maong lugar.

“Diha gyud sa duol sa pangpang ug wala sila mahug sa kanal lagmit sa pangpang sila punta,” matud niya. Siya midugang nga kusog ang uwan adtong higayuna nga usa usab sa rason nga dangog ang dalan nga posible maoy hinungdan. Si Asparo wala kini mapriso human wala mupasaka og kaso ang duha ka mga biktima. (BANAT NEWS)