Pahimangno aron di mabiktima

CEBU, Philippines - Mihatag sa publiko og mga basahon nga pahimangno batok sa mga dautang elemento ang kapolisan sa dakbayan sa Sugbo  alang sa umaabot nga Sinulog.

Ang Cebu City Police Office pinaagi sa Police Community Relations mipagawas og pahimangno sa dili pa mogawas sa balay ang publiko atol sa Sinulog. Si Sr. Supt. Noli Romana, hepe sa CCPO, miingon  kinahanglan nga secure ang mga balay ug kinahanglan nga dunay mahabilin bisan usa ka tawo aron sa pagbantay niini.

Sa miaging mga tuig dunay mga report nga gipalakaw lang ang mga tag-iya sa balay dihang miataki ang mga akyat-bahay.

Kinahanglan nga ibton ang mga appliances nga gisaksak sa outlet aron malikayan ang insidente sa sunog. Miingon si Romana nga iyang gihangyo ang publiko nga dili magdala og mga bata tungod kay daghan nang mga taho nga ang mga bata mawagtang o mawani tungod sa kadaghang tawo.

“Wag ng magdala ng bata, kasi madali silang mawala,” dugang ni Romana. Kung ugaling magdala og gagmay nga bata kinahanglan nga butangan kini og name tag, contact number sa ginikanan ug address  niini.

Mihangyo sab ang kapolisan nga isumbong dayon kanila kung dunay makit-an nga mga kadudahan og lihok nga mga tawo.

Mihangyo ang kapolisan nga dili magdala og dagkong kantidad sa kwarta kung molakaw ug dili magdala og mahalon nga alahas aron dili mabiktima sa mangunguot.

Likayan sab ang pagdala og mga mahait nga hinagiban ug likayan ang paglakaw ilabi na kon mag-inusara lang. Hangyo sa kapolisan nga mosanong sa awtoridad ug sa mga lagda sa simbahan ug sa carousel route sa Sinulog.

Ug aron mamintenar ang kalimpyo sa dakbayan mihangyo ang kapolisan nga dili magpatuyang og labay sa basura ug adto kini ilabay sa basurahan.

Tungod kay gi-implementar karon ang gun ban likayan sab ang pagdala og armas gawas sa panimalay. Kinahanglan sab nga sayran sa mga tawo ang bag-ong rota sa Sinulog tungod sa rerouting aron dali ra nga makasakay sa bisan asa ang imong adtoan.

Kun dunay makit-an nga butang sama sa bag, gift packs, nga gibiyaan sa mga lugar nga tapokanan sa tawo kinahanglan nga ireport sa kapolisan ug dili hilabtan ang maong butang basin bomba ang sulod niini.  (BANAT NEWS)