Lawas hulipan na sa katungdanan?
CEBU, Philippines - Gibutyag ni Lapu-Lapu City Mayor Paz Radaza nga dunay opisyal sa PNP Cebu nga kanunay’ng manawag kaniya ug nagpasabot nga buot kining mohulip ni Lapu-Lapu City Police Office Director P/SSupt. Rey Lyndon Lawas.
Atol sa press conference sa miaging adlaw wala hinoon ibutyag ni Mayor Radaza ang ngan sa maong opisyal apan iyang giklaro nga nia kini madestino sa PRO 7.
Gisukit ang mayor kun nasayud na ba kini nga hulipan si Lawas sa sunod buwan, si Radaza mitubag nga wala pa siya makadawat og komunikasyon bahin niini apan dako pa gihapon kini og pagsalig sa liderato ni SSupt. Lawas..
Si SSupt. Lawas nakaserbisyo na og duha ka tuig isip City Director sa kapolisan sa Lapu-Lapu ug mapupos kini karong Marso 2014.
Gitug-an ni SSupt. Lawas nga nakadawat na siya og suwat gikan sa Kampo Crame nga nagpahibalo sa iyang promosyon ug posibling hulipan na kini sa iyang katungdanan sa dakbayan sa Lapu-Lapu. (BANAT NEWS)
- Latest
