Mga namuyo sa Warwick-Barracks di pabalikon

CEBU, Philippines - Hayan nga dili na makabalik pagtukod og panimalay kadtong mga nasunogan nga pamilya diha sa Warwick-Barracks Market sa Barangay Ermita nga gihimo na nila nga pinuy-anan.

Wala magsilbi ang uwan kagahapon sa udto aron unta mapugngan ang sunog nga miulbo sa mao nga dapit nga kaniadto merkado apan nahimo na nga squatters area.

Si Mayor Michael Rama miingon nga dili pa siya makahukom kun angay ba nga tugotan ang mao nga mga pamilya nga makapatukod sila pagbalik og kapuy-an sa mao nga dapit.

Gipasabot ni Rama nga ang Warwick-Barracks Market usa ka merkado ug dili angay’ng himoong puy-anan sa mga tawo.

 Sa siyam ka satellite markets sa dakbayan sa Sugbo ang Warwick Barracks market maoy labing problema sa tagdumala sa Office of City Markets.

Pipila ra sa mga naninda nga anaa mahimutang daplin sa karsada ang mobayad og arkabala tungod kay kadtong tua sa sulod nga bahin sa kanhi merkado miingon nga wala na sila maninda.

Si Bise Mayor Edgardo Labella miingon ‘sab nga ang merkado angay’ng gamiton ra gayud sa pagpaninda ug dili kay himoon nga puy-anan.

Si Market Administrator Raquel Arce miingon nga ang Warwick Barracks Market maoy nahimong labad sa iyang ulo sulod sa taas na nga panahon.

Gusto unta ni Mayor Rama nga ang building nga tukoron sa mao nga lugar idesinyo nga kaparkingan og mga sakyanan ang ibabaw nga bahin.  (BANAT NEWS)