Bata napaig sa carbon
CEBU, Philippines - Usa ka 10-anyos nga bata ang napaig uban sa pagkaabo sa Warwick-Barracks sa Carbon Public Market sa barangay Ermita ning siyudad sa Sugbu pasado alas-10 kagahapon sa buntag.
Pito usab ka tawo ang nangaangol sa maong hitabo ug duha ka lalaki ang gidakop tungod kay naaktohang nangawat sa mga nasunogan.
Sumala pa ni SFO2 Daniel Relatado Jr., fire investigator, nga nahinabi sa Banat News nga nadawat sa kabomberohan ang alarma sa alas 10:35 sa buntag nga miabot sa Task Force Bravo.
Gideklarar nga under control ang kayo sa alas 11:25 sa buntag ug gibana-bana nga moabot sa P1 milyon ang danyos sa maong sunog sumala pa ni Relatado.
Pito ka tawo ang gikatahong napaso, usa ang naglisod og ginhawa ug duha ang nasamad sa tiil ug usa ang nasamad sa nawong sa maong sunog ug matud pa nga usa ka 10-anyos nga batang lalaki ang napaig.
Matud pa ni Relatado nga nakit-an ang patay nga lawas ni Jerry Consas pasado alas 2:00 sa hapon kagahapon, ang maong bata matud pa gipukaw sa iyang uyoan tungod sa sunog apan wa na kini makit-i human sa pagdinaganay sa mga tawo.
“Nagtabang-tabang ni’g tinda ma-kaadlawon gipukaw sa uyoan, nibangon wa na kit-i,†sumala ni Relatado.
Si Ignacia Auman, 63, bakery helper, nga nahinabi sa Banat News miingon nga siya ug ang iyang bana nga si Jovito, 69, miadto sa bakery sa iyang amo aron sa pag-train sa bag-ong baker. Mao na lay nabantayan sa magtiayon nga nagkayo na ang Warwick-Barracks maong midagan sila padulong sa dalan Magallanes apan napaso sila tungod sa kainit sa kalayo.
“Paggawas na sa kayo nigawas mi, init na man kaayo, napaso mi,†sumala pa ni Ignacia.
Si Reynaldo Rosario nasukarap ug nabuwasot dihang iyang giapas ang iyang mga pag-umangkon nga 4 ug 6 anyos ug nagkugos pa sa iyang unom pa ka buwan nga pag-umangkon sa internetan dihang miulbo ang sunog duol sa ilang stall.
“Grabe na gyud ang kayo, dako na jud, ang mga bata ra jud ang akong gisiguro,†matud pa ni Rosario.
Ang kapitan sa barangay Ermita nga si Felicisimo Rupinta miingon sa Banat News nga 50 ka pamilya ang kasamtangan nga nagpuyo karon sa Sports Complex sa Ermita nga kinahanglang ilang mapakaon.
Hangyoon sab ni Rupinta ang Department of Social Services aron mabutangan og portaletes ang sports complex.
Padayon pa karon ang imbestigasyon sa kabomberohan sa hinungdan sa sunog ug kun asa gyud kini nagsugod. (BANAT NEWS)
- Latest
