500 ka sakop sa CentCom ipakatap sa Sinulog 2014

CEBU, Philippines - Mopakatap og kapin sa 500 ka mga sundalo ang Central Command atol sa kasaulogan sa Sinulog agi og augmentation force sa kapolisan. Ang maong mga sundalo maggikan sa 2nd Air Division of the Philippine Air Force, 53rd Engineering Brigade ug sa Naval Forces Central, matud pa ni Lt. Jim Alagao, ang tigpamaba sa Centcom. Matud pa nga di momenos sa 160 ka sundalo ang i-deploy isip crowd control team, usa sab ka team sa Explosive Ordnance Division, K9 Unit, ug covert teams sa Quick Reaction Force ipakatap sa nagkalain-laing lugar sa dakbayan.

Sumala pa ni Alagao nga ang Centcom gilangkoban sa duha ka Task Group kini mao ang Task Group Cebu ug Task Group Bohol nga motabang sa seguridad. Dugang ni Alagao nga ang ipakatap sa Sinulog magagikan sa Task Group Cebu ug ang Task Group Bohol mamahimong reserved unit niini. Gipasalig sa tigpamaba sa Centcom nga bisan pa man sa pagpakatap sa mga sundalo sa Sinulog pabilin gihapon silang magbantay sa seguridad sa ubang dapit.   (BANAT NEWS)