Duha ka tawo naghikog

CEBU, Philippines - Duha ka tawo ang napalgang patay human kini naghikog sa nagkalain-laing lugar sa Sugbo sa miaging adlaw.

Patay nang nakit-an sa iyang suod nga higala diha sa sitio Lawis, barangay Alaska Mambaling, dakbayan sa Sugbo alas 7:45 sa buntag sa miaging adlaw.

Ang naghikog naila nga si Abdul Kadir Natangcop, 21, temporaryong nagpuyo sa maong lugar, lumad taga barangay Taraka, dakbayan sa Marawe.

Si Renante Valmores, suod nga higala ni Abdul miasoy sa kapolisan nga pag-abot niya sa iyang balay, nakit-an niya si Abdul nga nagbitay gamit ang usa ka pisi nga gihikot sa iyang liog ngadto sa kisame.

Matud ni SPO4 Alex Dacua sa Homicide Section sa Cebu City Police Office nga nahinabi sa Banat News nga suod nga higala si Abdul ug Valmores ug silingan ra usab sila ug diha kini magkan-anan ug sumbongan niya sa iyang problema sa balay.

Nabantayan nang daan nga pirmeng masulub-on si Abdul kay giingong nahiubos kini sa iyang inahan.

“Nangayo ni siya og kwarta sa iyang mama unya gibalibaran man mao’ng nahiubos,” matod pa ni Dacua.

Samtang, napalgang patay usab ang usa ka mag-uuma sa barangay Maigang lungsod sa Barili alas 5:05 sa hapon sa miaging adlaw. Ang nagpakamatay mao si Alberto Jurado Antoni, 31, molupyo sa sitio Kalubihan sa maong lungsod.

Basi sa imbestigasyon nga gihimo ni PO2 Jessie Lloyd Sebial sa Barili Police Station  nga naalarma ang pamilya ni Alberto human kini nakadungog og buto sa pusil gikan sa lawak niini.

Si Gina Antoni, igsuon ni Alberto miasoy ngadto sa kapolisan nga sa dihang giablihan nila ang lawak ni Alberto, nakit-an na nila kining naghigda sa salog ug nagkadugo ang tuong bahin sa iyang ulo ug naa sa iyang kiliran ang pusil nga gigamit.

Daling gidala sa tambalanan si Alberto apan gideklara na kining dead on arrival sa miatiman nga doktor.

Si PO3 Elpi Cutas sa Barili Police Station nahinabi sa Banat News/The Freeman miingon nga wa pa nila masuta ang rason sa pagtapos ni Alberto sa iyang kinabuhi.

Apan si Carlita Antoni, igsuon usab ni Alberto miingon sa kapolisan nga hilumon nga pagkatawo si Alberto ug nakasinati kini og nervous breakdown sa milabay nga mga adlaw.

Nakuha usab sa kapolisan sa lugar gihitaboan ang duha ka bala ug usa ka kabhang sa kalibre .22 magnum ug ang nahisgutang armas nga way lisensya. (BANAT NEWS)