Bana’g asawa patay sa bala

CEBU, Philippines - Gipusil patay sa usa ka bana ang iyang asawa human sa ilang init nga panaglalis sa wala pa kini mag-unay og pusil sa iyang  kaugalingon  sulod  sa ilang  balay   sa barangay Tubod sa lungsod sa Barili kagahapon  sayo  sa buntag. Napalgan sa kapolisan ang patay nga lawas ni Maricel Gerandoy, 33, ug  sa bana  niini nga  si  Rodelito, 44  pasado alas 7:00  kagahapon sa buntag.         

Nasuta  sa mga  otoridad  nga  si Maricel samdan  sa  dughan ug ulo  nga nagligid  sa hawanan  sa  ilang  balay,  samtang si Rodelito  may  pinusilan   usab  sa ulo  ug didto na  magbay-ad sa  25 metros ang  distansya  gikan  sa balay niini nga nagluklok pa sa iyang Smith and Wisson .357 ug .45 nga pistola   nga  may  duha  ug  upat  ka  buhing  bala  ang  usa  ug  usa.          

Gideklarar nga dead on arrival ang duha didto sa Barili Rural Health Unit.        

Si Maricel usa ka clerk sa San Isidro Water System Cooperative(SIWSC) samtang si Rodelito nagtrabaho isip maintenance sa SIWSC.         

Matud pa ni PO2 Jotemar Tejano, desk officer, sa Barili  Police  Station  nga nahinabi sa Banat News, nga ang mga silingan sa magtiayon maoy nakadungog og mga buto-buto sa  armas sukad pa kagahapon sa gabii, hangtod  na  sa kaadlawon nga gikan sa balay sa magtiayon.        

Nasayran  nga nag-away ang magtiayon pasado alas 8:00 kagahapon sa gabii ug pipila ka oras   mao  na lay  nadunggan  sa  mga  silingan  ang  mga  buto  sa armas  de fuego dayon  nahilom. Miingon  si  Tejano nga ang inahan ni Rodelito nga si Feliza,  mibadlong  sa pagpaundang  sa  away  sa magtiayon  kay nasaksihan sa mga anak  ang  panaglalis sa duha.   Si Insp. Arvi Arbuis ang hepe sa Barili Police  Station   miingon nga naguba ang pultahan sa balay sa magti-ayon  nga  usa  ka timailhan nga molakaw unta si Maricel apan gipugngan kini ni Rodelito.          

Giingon  nga si Rodelito adunay nervous breakdown kaniadto ug may mga  taho nga tiggamitan kini og illegal nga drugas.        Wala  pa masuta  sa kapolisan  kun unsay  gilalisan  sa magtiayon apan  sa dapit  nga  nahitaboan  may  tulo ka  kabhang  sa  357  ang  ilang nakit-an .         Padayon  pa  nga  giimbistigar  sa kapolisan  ang  maong  hitabo.  (BANAT NEWS)