Kahimtang sa kahayopan susihon sa DA-BAI

CEBU, Philippines - Ang Department of Agriculture-Bureau of Animal Industry (DA-BAI) nanguna sa Animal Relief and Rehabilitation for the Philippines (ARRPh) bahin  sa nagpadayong rehabilitasyon sa mga lugar nga naigo sa miaging kalamidad sa Kabisay-an. 

Matud pa ni   Philippine Information Agency sa Central Visayas (PIA-7) Regional Director Minerva Newman nga ang ARRPh nakighimamat sa mga grupo sa animal welfare  aron masiguro nga ilang gipanghingusgan ang rehabilitasyon sa  mga kahayopan sa nagkalainlaing  dapit  sa nasud.

Dugang pa ni Newman nga ang mga  pundok  sa kagamhanan  ug  pribado nanag-alayon alang  sa pag-inambitay  og mga  kasayoran bahin   sa sitwasyon sa kahayopan.

Ilang  gilantaw  kanunay  ang  kaluwasan  sa publiko  gikan  sa rabies  nga  mugna  sa  mga hayop  nga  kagawon  sama  sa iro  ug iring  ug  uban  pang  matang  sa hayop.

Miingon  si Newman  nga  usa  sa gibantayan  sa maong  mga grupo  mao  ang mga  lugar  nga gihamok  sa  mga  dagkong  katalagman sama sa miaging  linog  ug  bagyong  Yolanda.

Kini  tungod  kay  daghang  panimalay  ang  nangagusbat  ug  gituohan  nga  bisan  ang  mga  kahayopan  niini  naungkag  usab  ang  pagkabutang.

Gipadayag ni Newman nga ang maong network nagplano nga  mopasiugda  og  rehabilitasyon  sa mga lugar nga apektado sa kalamidad aron sa  paghatag kanila og malahutayong panginabuhian alang sa ilang  mga amo. (BANAT NEWS)