Naghatud sa minatay gi-ambush patay

CEBU, Philippines - Lalaking nag-angkas og motor nga naghatud sa minatay niining uyoan sa sam-ang sa Marigondon gipusil patay diha sa sitio Abuno sa barangay Pajac, dakbayan sa Lapu-Lapu niadtong miaging adlaw.

Ang namatay mao si Jesson Pangatunggan Amistad, 24 , nagpuyo sa maong dapit samtang wala pa matumbok sa kapolisan ang tulo ka wa mailhing mga lalaki nga nagsakay og motor nga pulos nagsuot og closed-type helmet.

Si SPO1 Allan Pantaleon sa Homicide Section sa kapolisan sa maong dakbayan nga nahinabi sa Banat News miingon nga nag-angkas sa motorsiklo ang biktima nga gidala sa ig-agaw niini nga si Pablito Amistad Paeres, 35.

Samtang nag-aginod ang prusisyon sa minatay gituparan ang biktima sa laing nagmotor ug gidiretso pagpusil hinungdan sa pagkatagak niini.

Ang mga mamumuno dali usab nga mipabulhot sa ilang motor paingon sa direksyon sa barangay Agus sa maong dakbayan.  Patay na ang biktima paghidangat sa Mactan Doctors Hospital.

Nakuha sa crime scene ang duha ka mga kabhang sa bala sa kalibre .45. Gisubay karon sa kapolisan ang report nga dunay koneksyon ang biktima sa nadakpang gipasanginlang tulisan nga si Sandy Kho sa miaging buwan. (BANAT NEWS)