Nasaypang kawatan gipusil patay

CEBU, Philippines - Usa ka lalaking gidudahang nasaypang kawatan ang napalgang patay sud sa tugkaran sa usa ka baraderohan sa barko diha sa sitio Latasan sa barangay Labogon, dakbayan sa Mandaue alas- 7 pasado kagahapon sa buntag.

Si PO3 Heraclio Gamboa sa kapolisan sa Presinto 3 sa Mandaue City Police Office (MCPO) miila sa biktima nga mao si Ronnie Alvarado, 26, taga Zone Sibuyas, barangay Paknaan sa maong dakbayan.

Matud pa ni Gamboa nga ang biktima nakabaton og samad pinusilan sa iyang kalawasan nga maoy hinungdan sa iyang kamatayon. Giimbestigar karon ang tulo ka mga gwardiya sa maong baraderohan kalabot sa kamatayon sa biktima.

Dako ang pagtuo sa kapolisan nga posibleng gidudahan sa mga gwardiya ang biktima nga usa ka kawatan. (BANAT NEWS)