P1.89 bilyones ang gahin sa Mandaue ning tuiga
CEBU, Philippines - Mokabat sa P1.89 bilyones ang giaprobahan sa konseho nga gahin sa kagamhanan sa dakbayan sa Mandaue alang sa tuig 2014.
Kini labaw og siyam ka porsiyento kun itandi sa gahin sa miaging tuig 2013 nga nagkantidad lamang og P1.73 bilyones. Ang maong gahin nga gipirmahan usab ni Mayor Jonas Cortes sa miaging bulan, gibahig diin P1.63 bilyones niini alang sa general services.
20 porsiyento alang sa development fund nga kuhaon gikan sa Internal Revenue Allotment (IRA) nga nagkantidad og P99.68 milyones.
Public market gigahinan og P87.02,; P50.56 ang alang sa City Hospital, P19.24 milyones sa ihawan sa dakbayan ug P10.55 milyones ang alang sa City Sports and Cultural Complex. Si Konsehal Diosdado Suico nga maoy chairman sa committee on budget sa konseho sa dakbayan nga nahinabi sa mga tigbalita miingon nga ilang giaprobahan ang maong gahin alang karong tuiga base usab sa gisugyot nga gahin sa local finance committee sa executive department.
Matud pa ni Konsehal Suico nga ang mga hepe sa nagkalain-laing departamento sa sayo pa maoy misugyot sa P2.28 bilyones unta nga gahin alang sa tuig 2014.
Samtang ang General Services Department sa dakbayan gigahinan og P491 milyones ug P187 milyones ang City Engineer’s Office.
Apan gilaslasan sa local finance committee ang maong gahin nga giduso sa executive department pinaagi sa ilang pagpahaum sa kantidad sa makolektang buhis alang karong tuiga. (/WC)(BANAT NEWS)
- Latest
