Siyam ka tawo gipamaak sa irong buang

CEBU, Philippines - Siyam ka tawo ang gihakop karon sa tumang kalisang nga basin sila’y mamatay sa rabies human sila gitagsa-tagsa pagpaak sa iro’ng buang didto sa Barangay Malubog, usa ka bukid nga bahin sa dakbayan sa Sugbo.

Duha sa mga napaakan sa iro’ng buang mga bata pa nga sila si AsleyMarie Mosua ug Niño Waga, parehong kwatro anyos ang panuigon. Ang duha ka bata apil sa walo nga nag-ambahan sa pagpangayo’g tabang sa opisina ni Vice Mayor Edgardo Labella aron sila mahatagan og ikatulo nga pang-injection og anti-rabies vaccine.

Gawas sa duha ka bata, ang ubang tawo nga nagpatabang kang Labella mao sila si Norma Enocian, 42, Bernadette Enocian, 27, Edmond Jabadan, 22, Ryan Arcayan, 16, Irene Belinia, 33 ug Melvin Arcilla, 14.

Ang ikasiyam nga napaakan og iro nga matud pa usa ka hamtong apan wala mouban sa grupo nga nangayo’g tabang kang Vice Mayor Labella.

Ang mga biktima misaysay sa mga staff sa bise mayor nga daghan pa unta’ng mga tawo ang mapaakan sa mao’ng iro nga buang kun wala pa sila makadagan.

Matud pa nga kutob sa mga tawo nga masugatan sa mao nga iro hutdon og gukod ug gipangpahit, sagad anha sa ilang mga bitiis. Dunay usa ka tawo nga gigukod na unta sa mao nga iro’ng buang ang nakalingkawas kay nakasaka sa kahoy hangtud nga ang iro napatay sa mga lumulopyo.

Si Dr. Alice Utlang nga kanhi veterinarian sa dakbayan sa Sugbo namahayag nga ang mga ulo sa iro nga makapaak kun kini mamatay susihon g’yud unta dayon sa laboratory sa Department of Agriculture (DA).

Daku ang pagtoo sa mga lumulopyo sa Barangay Malubog nga nabuang g’yud ang mao nga iro mao nga nagpataka na lang kini sa pagpamaak.

“PNP man to’ng mao nga iro,” matud sa usa sa mga biktima. Ang kahulogan sa PNP nga iyang gipasabot dili Philippine National Police kun dili “Pataka Na’g Pamaak.”

Sagad sa mga iro nga malisoan sa maayong pangisip mao kadtong mga iro nga kanunay lang mapasaran sa iyang pagkaon. Ang usa ka iro nga matakboyan og rabies mamatay ra gihapon labing dugay 14 ka adlaw gikan sa pagtakboy sa virus bisan dili kini makapaak og tawo.

Gipasaligan ni Labella ang mga biktima nga matabangan nga makakuha sa gikinahanglan nga vaccine  gikan sa Department of Health. (/EIM)(BANAT NEWS)