Gisaka sa balay gipusil patay

CEBU, Philippines - Patay ang usa ka lalaki nga gisaka sa gipuy-an niini sa dalan F. Ralota sa barangay Poblacion sa dakbayan sa Danao alas-12 pasado ang takna sa miaging tungang gabii.  Ang namatay mao si Peter Rom, 31, wala’y trabaho nga nagpuyo sa maong dapit ug  ang nagpusil mao ang tulo ka wala hiilhing lalaki nga pulos nagtaptap og panapton sa ilang nawong.           

Si SPO4 Arestio Espina sa kapolisan sa maong dakbayan nga nahinabi sa Banat News miingon nga natulog na ang biktima  dihang dunay nanuktok sa pultahan niini.           

Matud pa ni Espina, sa pag-abli sa biktima gisugat kini og sumbohan sa armas sa tulo ka wala hiilhing lalaki ug gipusil kini sa makadaghang higayon.Naigo ang biktima sa iyang ulo, ug uban pang bahin sa iyang kalawasan  ug  nagdali sa pagsibat pahilayo ang mga mamumuno.  Daling gitabang sa mga sakop sa pamilya ang biktima ug gihatod kini sa Danao District Hospital apan ang mga doktor nga maoy nag-atiman mideklarar niini nga dead on arrival.           

Si Espina miingon nga usa sa ilang gisubay nga motibo kung duna bay gikaaway ang biktima. (BANAT NEWS)