Magpataka og labay’g basura sikupon na–DPS

CEBU, Philippines - Kadtong mga tawo nga magpataka lang sa paglabay sa ilang mga basura daplin sa kadalanan angay na karon nga magmatngon kay ang bag-ong hepe sa Department of Public Services (DPS) gusto nga estriktohon ang paghimo’g kampanya batok kanila.

Si Engr. Rolando Ardosa nga maoy bag-ong hepe sa DPS ug mosugod na paglingkod sa katungdanan karong adlawa namahayag nga tigumon niya ang tanang mga sakop sa Barangay Environmental Officers (BEO) sa lainlaing mga barangay aron awhagon nga dakpon g’yud ang pagpataka’g labay sa basura.  Ang pamahayag ni Ardosa iyang giluwatan kay matud sa kanhi hepe sa DPS Dionesio Gualiza nga daghang mga tawo ang molabay gihapon og mga basura diha daplin sa karsada bisan og nahakot na sa mga garbage trucks ang mga sagbot hinungdan daw di mahurot ang mga basura  sa daplin sa mga karsada.

Matud ni Gualiza nga adunay kapin sa 120 ka garbage trucks nga gipanag-iya sa lainlaing barangay ug kapin ‘sab sa 50 ka mga garbage trucks nga iya sa DPS, apan dili kini makasulbad sa problema sa basura kun ang mga tawo magpataka lang paglabay sa ilang mga sagbot.

Ang DPS adunay oras nga gilatid nga ang mga tawo mohatud sa ilang mga basura kay mao kini ang pag-agi sa mga garbage trucks apan matud ni Gualiza nga daghan sa mga tawo mga “gahi’g ulo.” Gitinguha ni Ardosa nga hatagan og leksyon pinaagi sa pagpadakop kanila sa mga sakop sa BEO aron pamultahon basi sa salaud nga ilang nahimo. (BANAT NEWS)