Sikyu nga mitulis bangko nadakpan

CEBU, Philippines - Nasikop sa kapolisan kagahapon sa udto  sa sitio Gamboa, barangay Tadlong sa Sagay City sa Negros Occidental ang gwardiya nga suspek sa pagpusil patay sa tulo ka tawo ug pagtulis sa Fair Bank sa Daanbantayan pipila ka oras sa wala pa ang Bag-ong Tuig.

Ang nasikop mao ang 28-anyos nga si Berly Tudtud sa hiniusang operasyon sa Provincial Intelligence Branch sa Cebu Provincial Police Office nga gipangulohan ni Sr. Insp Wilson Abot ug sa Sagay Police Station pinangulohan ni Insp. Joevito  Bose.

Matud ni Insp. Joevito Bose, ang hepe sa Sagay Police nga nahinabi sa Banat News nga posibleng kaliwat ni Tudtud ang iyang giabtan sa Sagay apan wala siya makahibawo kun kanus-a kini naabot sa maong lugar. 

Na-recover sa kapolisan ang usa ka granada gikan ni Tudtud apan wala na marekober nila ang 12- gauge nga shotgun nga gigamit niini pagpusil sa  kauban niyang security guard nga si Dean Deserto, 26, ka live-in partner ni Deserto nga si Cecilia Torre, 30, molupyo sa barangay Dakit, dakbayan sa Bogo ug ni Jenelyn Megabon, 26, accounting clerk sa  Fair Bank molupyo sa Medellin.

Ang tulo ka biktima gilubong na kagahapong adlawa pipila ka oras human nadakpan ang suspetsado.

Matud pa ni Insp. Bose nga posible nga ibiyahi si Tudtud pabalik sa Sugbo kagabii aron atubangon niini ang kasong robbery with multiple homicide.

Matud pa ni Sr. Insp Wilson Abot nga ilang gisubay si Tudtud base sa iyang record nga gihatag sa Ricarte Security Agency nga naglakip sa iyang gideklarar nga address.

Si Tudtud matud pa nga lumad nga taga-Sagay apan didto na kini nagtubo sa dakbayan sa Bogo.

Matud pa ni Abot nga ilang giadto sa Bantayan, Bogo, Sagay ug Silay ang suspetsado ug ilang gipahibalo ang mga kapitan nga motawag kanila kung masigpatan nila si Tudtud.

Alas 7:00 sa buntag nasigpatan si Tudtud sa Hacienda Concepcion ug daling miadto ang kapolisan sa maong lugar. Matud pa nga dihang nakabantay ang suspetsado dali kining misibat hinungdan nga gigukod kini sa kapolisan.

Sumala pa nga milabang sa sapa ang suspetsado apan naabtan kini ug nasikop gyud human sa upat ka adlaw nga pagtagotago.

Si Tudtud mag-atubang sa kasong robbery with multiple homicide. (BANAT NEWS)