Mipatay sa konsehal nadakpan

CEBU, Philippines - Nadakpan ang  giingong ‘gun for hire’ nga maoy  mipatay sa kanhi barangay kapitan ug kasamtangang konsehal sa barangay Pulog, lungsod sa Consolacion  didto  sa barangay  Cabangahan, kagahapon  sa ala 1:00 pasado  sa hapon .

Ang nadakpan mao si Sonny Tevez Suarez, 38, minyo, nga giingong kanhi binilanggo sa Davao Penal Colony. Ang suspek   kasamtangang  nagpuyo sa barangay Cabangahan, kasikbit nga barangay  sa Pulog.

Si PO1  Socrates Borinaga sa kapolisan sa maong lungsod nga nahinabi sa Banat News miingon nga ang team sa kapolisan nga gipangulohan sa ilang deputy chief Inspector Socrates Medello maoy nakadakop kang Suarez sa balay  niini didto  sa Cabangahan.

Dugang pa niya nga pag-umangkon ni Suarez ang iyang kauban  nagmotor  dihang  gipatay  niya  ang  biktima.

Nasayran nga ang biktima nga si barangay Konsehal Rey Sasing Balaba, nga kanhi barangay kapitan  nakig-estorya  sa iyang  mga  silingan didto   sa  iyang tindahan.

Nahiabot  ang duha ka suspetsado nga nagsakay og motorsiklo nga nagtabon og panapton sa ilang mga nawong ug kalit niining gipusil ang biktima sa kalibre 45 nga armas de fuego.

Si PO1 Borinaga miingon nga human   matumba ang  biktima   mipabulhot dayon   pahilayo  ang  suspek.

 Ang biktima dali nga gihatod sa iyang mga kabanay ngadto sa North General Hospital sa barangay Banilad sa dakbayan sa Sugbo apan nakabsan kini sa kinabuhi sa paglabay sa pipila ka oras.

Gitataw ni PO1 Borinaga nga  ilang gisubay  karon  ang  duha  ka anggulo  nga  may  labot  sa iyang  pagka-konsehal  o  kaha  sa iyang pagka-supervisor  sa   usa ka kompaniya sa dakbayan sa Mandaue.  (BANAT NEWS)