Balay sa koreano gilungkab, balor P120 mil nga gamit ug kwarta nasakiyo

CEBU, Philippines - Kapin sa P120 mil ang nasakiyo sa mga kawatan nga milungkab sa balay nga gipuy-an sa usa ka langyaw diha sa #69 Paseo John sa Maria Luisa Subdivision, barangay Banilad sa dakbayan sa Sugbo pasado alas 8:00 sa buntag sa miaging adlaw. Ang biktima naila nga si Choi Chung Weon, 40, usa ka Korean national kasamtangang nagpuyo sa nahisgotang dapit.

Nasuta sa ocular inspection sa mga sakop saTheft and Robbery Section sa Cebu City Police Office nga ang mga suspetsado misulod sa balay agi sa sliding door sa sala nga nalimtan og lock sa biktima.

Matud pa nga  gikuha nila ang usa ka Iphone 4 nga mobalor og P20 mil, Iphone 5 P30 mil, usa ka Galaxy Note P20 mil, usa ka Galaxy S3 P10 mil ug usa ka tablet nga Google Nexus nga mobalor og P10 mil. Nakuha sab sa kawatan ang pitaka sa biktima nga may sulod nga P10 mil ug ang P4 mil nga salapi sa asawa sa biktima ingon man koleksyon niini sa mga kwarta sa nagkalain-laing nasud nga mobalor og P10 mil.  (BANAT NEWS)