Pamilya ni JVR mopasaka gyud og kaso vs MDH

CEBU, Philippines - Ang pamilyang De los Reyes mibahad nga mopasaka og kaso batok sa Mandaue District Hospital sa giingong wala pag-atiman kang John Venth De los Reyes nga anak ni Talisay City Mayor Johnny De los Reyes ug sa uyab niining si Salve Vega.

Kahinumduman nga si John Venth ug Vega kinsa nakaangkon og mga paso sa kalawasan human nga ang hose sa radiator tank nga ilang gisakyang motorsiklo mibuto kini. Ang duha midangop ngadto sa nahisgutang tambalanan aron unta magpatambal apan giingong wala sila atimana tungod kay giingong gipangayoan sila og police report ug medico legal report, butang nga gihimakak sa MCH.

Si John Venth uban sa iyang pamilya gikatakdang makigkita kang Mandaue Mayor Jonas Cortes aron tukion ang maong isyu.

Gibutyag ni John Venth nga usa ka nurse sa nahisgutang tambalanan ang giingong misulti nga dili sila mohilabot og vehicular accident ug ang maong insidente giingong nahitabo sa dakbayan sa Sugbo. Apan sila nangangkong sa barangay Subangdaku, dakbayan sa Mandaue nahitabo ang insidente. Si John Venth mibahad nga mopasaka sila og kaso batok sa MDH aron ang ilang gidangatan ni Vega dili na mahitabo ngadto sa uban pang pasyente nga moduol sa maong tambalanan.

Si John Venth nasagmuyo usab sa mga gipamahayag sa hepe sa tambalanan nga si Dr. Maria Lourdes Espinoza tungod kay niadtong panahona on leave man kini.

Si Talisay City Administrator John Yre De los Reyes, maguwang ni John Venth nga nahinabi sa Banat News nagkanayon nga mag-agad sila sa ilang amahan nga si Mayor Johnny De los Reyes kabahin sa lakang nga ilang himuon.

Gipasabot ni Yre nga ang ilang planong pagpasaka og kaso batok sa MDH dili kini tungod kay nasuko sila apan buot nila kining hatagan og leksiyon.

Si Yre mipadayag usab kini sa iyang kasagmuyo sa mga pamahayag nga daw nabali  na hinuon nga sila maoy naghimo-himo og estorya batok sa MDH. (/EIM)(BANAT NEWS)