Lalaking gipik-ap sa taga drug rehab namatay, daghang bun-og

CEBU, Philippines - Padayon karon ang imbestigasyon sa kapolisan sa kamatayon sa 42-anyos nga si Jerome Bendebel pasado alas-2 sa kaadlawon niadtong Enero Uno sa Perpetual Soccuor Hospital. Matud pa ni SPO1 Ruth Violango sa Homicide Section nga nahinabi sa Banat News, patay na ang biktima dihang nahidangat kini sa tambalanan apan gisulayan pa kini og tabang sa mga doktor sa maong tambalanan.

Apan sa alas 3:30 sa kaadlawon tungod kay wala na gyud matabang nila ang biktima gideklarar na sa mga doktor nga patay na kini.

Matud pa ni Violango nga sumala sa findings sa doktor sa Perpetual Soccour nga naputos sa bun-og ang lawas ni Bendebel.

Dugang ni Violango nga may agi sa kumo nga mimarka sa kilid sa lawas   niini. Matud pa ni Violango nga tataw kaayo nga dunay mga physical injuries ang biktima.

Apan sa taho ni Edgar Escalante sa TV Patrol Central Visayas kagahapon nga nasuta sa autopsy sa PNP Crime Lab nga giatake sa kasing-kasing ang biktima.

Matud pa sa samang report nga duhay duha ka tawong taga pribadong drug rehabilitation center nga miduol sa hepe sa polis sa maong lungsod niadtong Disyembre 31 sa gabii ug matud pa nangayo og police escort kay duna sila’y pick-apon nga tawo.

Apan wala kini tagai sa hepe nga si Insp. Richard Oliver tungod kay wala kini makapakita og ID ug court order.

Matud pa ni Violango nga gikuha ang biktima sa upat ngadto sa lima ka tawo sa barangay Tunga sa lungsod sa Balamban. Sa lahi nga report gikan sa Balitang Bisdak kagahapon sa hapon, giingong ang mismong igsuon sa biktima ug may pagtugot sa asawa niini ang pagpapik-ap kaniya sa taga drug rehab kay gibati na sila og kabalaka.

Apan wala sila magdahom nga maingon-niadto ang dangatan ni Bendebel nga mapuno kini og mga bun-og ug mamatay.

Sumala pa ni Violango nga gi-turnover na nila ang findings sa ilang imbestigasyon ngadto sa Balamban niadtong Enero 1.

Gisuwayan sa Banat News pagtawag ang hepe sa Balamban Police Station kagahapon apan wala gyud kini motubag sa among mga tawag. (/EIM)(BANAT NEWS)