Mga balay gitugpahan og bala atol sa Bag-ong Tuig

CEBU, Philippines - Usa ka tawo ug upat ka panimalay ang gikatahong naigo sa saag nga bala o stray bullets subay sa taho sa kapolisan sa dakbayan ug lalawigan sa Sugbo human sa Bag-ong Tuig.

Unang gikataho nga naigo sa stray bullet mao ang panimalay ni Valentine Sosmena sa pagtung-tung sa Bag-ong Tuig sa Andres Abellana Extension sa barangay Guadalupe sa Cebu City.

Matud pa nga ang bala milusot gikan sa atop ug sa kisami sa ikaduhang andana sa balay sa biktima nga miigo sa TV ug sa lampshade   niini.

Gibana-bana nga mokabat sa P18 mil ang danyos sa maong hitabo ug nakarekober ang kapolisan og slug sa .9mm sa salog sa balay sa biktima ug walay naangol sa maong hitabo.

Ikaduha nga naigo mao   ang balay ni Nenette Raga Rejano, 33, sa sitio Pandayan, barangay Basak San Nicolas sa dakbayan sa Sugbo.

Matud pa nga 45- minutos human ang Bag-ong Tuig usa ka bala ang milusot sa atop ug miigo sa salog ug swerte kay walay naigo sa maong bala.

Nakarekober og slug sa kalibre .45 nga pistola ang kapolisan sa salog sa balay sa biktima.

Samtang sa alas 2:00 sa hapon sa miaging adlaw naigo sa bala si Avelina Villafuerte, 51, molupyo sa Barangay Upper Azucena sa lungsod sa Barili.

Matud pa nga nagputos sa iyang tinda ang biktima sa kusina dihang naigo ang iyang tuong bukton sa wala pa matino nga bala.

Mitapsing usab kini sa iyang tiyan hinungdan nga nakaangkon kini og paso.

Ang maong bala milusot gikan sa atop sa ilang balay.

Samtang sumala pa sa report sa DYRC Radyo Calungsod, ang balay mismo ni Atty. Christopher Yap sa barangay Mabolo natugpahan usab og bala sa gituohang gikan sa kalibre .45, maayo na lang nga way tawong naigo.

Padayon karon ang imbestigasyon sa kapolisan sa responsable sa maong hitabo. (/EIM)(BANAT NEWS)