MCCI motuki sa yangungong wage increase sa mamumuo

CEBU, Philippines - Gitun-an karon sa mga magpapatigayon sa dakbayan sa Mandaue ang pagkonsiderar sa gipangayo nga usbaw sa suholan nga giduso sa wage board sa mga mamumuo alang  niining mosunod nga mga bulan sa 2014.

Kini ang gipadayag ni Philip Tan nga maoy presidente sa Mandaue Chamber of Commerce and Industry (MCCI) nga nahinabi sa mga tigbalita niadtong miaging adlaw.

Matud pa niya nga nagkinahanglan kaayo ang pagsinabtanay ang sektor sa  mga mamumuo ug mga magpapatigayon sanglit daghan usab karong panahona ang nanginahanglan og  trabaho.

Gipasabot ni Tan nga gitan-aw karon nila ang job generation alang sa pagtubag sa panginahanglan sa mga tawo nga ilang katrabahoan nga maoy nakapatumaw karon sa ilang kabalaka nga dili na hinuon makapatuman ang mga magpapatigayon sa giplano nga pagpalapad pa sa ilang negosyo.

Dugang pa ni  Tan, nga kun kahatagan og katumanan ang gipangayong usbaw sa  suweldo sa mga mamumuo,  mao unya kini ang makaingon sa kausaban sa plano sa  mga negosyante sa pagpalapad pa sa ilang negosyo.

Si  Tan miingon nga posible nga maangan-angan na lamang ang plano sa mga negosyante sa pagpalapad pa sa ilang negosyo nga makahatag usab unta og kahigayonan sa uban pa nga walay trabaho  nga makakita og kasudlan og trabaho.

Giangkon ni Tan nga ang mga magpapatigayon ug ang mga mamumuo  kinahanglan nga magsinabtanay sanglit ang duha nagkinahanglan sa usa’g-usa. (/EIM)(BANAT NEWS)