99 ka kaso ang nabuthan sa firecrackers, saag nga bala

CEBU, Philippines - Ang Sugbo maoy dunay labing daghang kaso nga natala sa mga nabuthan sa pabuto o firecrackers atol sa holiday seasons.

Matud pa sa Department of Health-7th  Regional Epidemiology Surveillance Unit (RESU) nga adunay 99 ka mga kaso ang natala sa tibuok Central Visayas,  ug nag-edad og usa pa ka tuig nga bata ang labing kabata ug 65- anyos ang labing tiguwang nga nabiktima.

Matud pa ni Rennan Cimafranca, ang regional epidemiologist nga sa 99 ka kaso, 90 niini ang dinhi natala sa Sugbo, unom sa Bohol, duha sa Negros Oriental ug malampuson ang kampanya didto sa Siquijor tungod kay bisan usa ka biktima walay natala kanila.

Dinhi sa Sugbo, sa 90 ka kaso, unom niini ang naputlan sa ilang mga tudlo, 64 ang nangasamad lang nga wala gikinahanglanang putlan sa ilang mga tudlo, 16 niini ang nangaigo sa mata ug adunay laing duha pa nga wala matino ang hinungdan.

Aduna usab natala nga duha ka biktima sa saag nga bala nga naglakip sa 65- anyos nga naigo sa walang bahin sa iyang paa didto sa barangay Mantuyong, Mandaue City ug ang 36- anyos nga taga Sudlon II siyudad sa Sugbo nga naigo sa iyang tuong deltoid.

Matud pa ni Cimafranca nga ang usa ka tuig nga bata uban sa iyang usa pa ka laing igsuon nga kapin usab usa ka tuig uban niini ang inahan nangapaso ang ilang bitiis human nisulod sa ilang balay ang usa ka pabuto nga niagi sa bintana.

"Dili hinoon grabe pero nangapaso gyud ang ilang batiis," matud pa ni Cimafranca. Aduna usab usa ka kaso nga nakatulon og watusi.

Kasagaran sa mga biktima nabuthan sa Kwitis, Piccolo, Pirate, Sparkler, Thick Long, Triangle, Whistle Bomb, Hotdog, Onga-onga, Flying Tiger, Watusi, Lantaka ug Fountain.

Ang na-monitor nga mga nabuthan natala sugod niadto pang Disyembre 16, 2013 hangtud Enero 2, 2014 (kagahapon) sa  alas 10:00 sa buntag ubos sa kampanya nga Oplan: Kontra Paputok sa DOH.

Matud pa usab sa report sa RESU nga ang Cebu City maoy labing daghang kaso sa nabuthan diin aduna kini 33 ka kaso.

Gisundan kini sa Lapu-Lapu City (18),  Talisay City (11),  Mandaue City (10),  Danao City (3),   Balamban (2) ug usa ka kaso sa Concolacion, Medillen, Oslob ug San Remegio.

Mahuman ang monitoring sa DOH-7 batok pabuto karong Domingo, dungag pa ni Cimafranca. –/EIM (BANAT NEWS)