Mga drayber sa Taxi gipasidan-an batok sa tulisan

CEBU, Philippines -   Higpit  nga gipahimangnoan sa kapolisan ang mga  drayber  sa taxi  batok sa mga pasahero niini  nga  tulisan.

Matud  pa sa kapolisan  nga  ang  mga  tulisan  mosiaw  sa  panahon  nga  mingaw  o  kaha  daghang  mga  pasahero.

Matud pa ni PO2 Jessie James Galo sa Presinto 2 sa Mandaue City Police Office (MCPO) nga nagbase sa barangay Subangdaku  nga may usa  ka tulisan nga   mibiktima   kang Efren Ulila, 37,  usa  ka  drayber sa taxi  nga  giluba  sa miaging  gabii.

Miingon si PO2 Galo nga ang wala hiilhing lalaki misakay  didto sa San Miguel, Lorega sa dakbayan sa Sugbo ug nagpahatod sa barangay Subangdaku sa  Mandaue.

Pag-abot  nila  sa   dalan M. Logarta sa nahisgotang barangay,  ang  maong  pasahero kalit  nga  mimando   sa drayber  sa pagpahunong sa  taxi . Unya gihansakan  dayon   og  kutsilyo  ang  biktima, apan  gumikan  sa kaabtik  sa maong  drayber,  iyang  gilayug  ang  tulisan.

 Matud  pa  ni  PO2 Galo  nga wala maratol  ang drayber    ug  ang  kaisug  niini  nakapatagak   sa kutsilyo sa tulisan sulod sa  taxi.

Gumikan  kay  naratol,  human  layuga sa biktima, gibati og kalisang  ang  maong tulisan   hinungdan nga mikaratil kini og dagan pahilayo.

Matud pa  ni PO2 Galo nga wala makadala og salapi nga kinitaan sa biktima ang maong tulisan kay mikabad man  kini  og dagan.

Nanghinaot  si PO2 Galo  nga  ning  tuig 2014 nanghinaot  siya  nga tanang  drayber  may pangamot  aron  makasukol  sa  mga tulisan  nga  buot  modaugdaog  kanila. (BANAT NEWS)