Molabay og basura bisan di oras tinghakot

CEBU, Philippines -  Ang hepe sa Department of Public Services (DPS) miingon nga ang rason nga usahay dunay mga basura nga dili dayon nila mahipos mao nga may mga tawo nga dili motuman sa oras nga gisitar kanila sa paglabay sa ilang mga sagbot.

Gipasabot ni DPS Chief Dionesio Gualiza nga sama pananglit sa eskina Tres de Abril ug Katipunan Streets sa Barangay Labangon, dunay daghang mga tawo nga molabay sa ilang mga sagbot daplin sa karsada bisan og human na sila mokuha sa mga basura.

Matud ni Gualiza nga ang mga opisyal sa barangay sama pananglit ni Labangon Barangay Captain Victor Buendia ilang giingnan nga awhagon ang ilang lumulopyo nga ang basura ilabay sa dili pa ang alas siete sa buntag.

Ang tumong niini aron nga sayo kaayo nga mahakut sa DPS ang mga basura apan aduna g’yuy mga tawo nga dili mopatoo ug molabay gihapon og basura daplin sa karsada lapas sa oras. Kini maoy rason nga daghang mga basura nga makita nga nagtipun-og  gihapon daplin sa karsada.

Human sa eleksyon, nabantayan ‘sab nga daghang mga basura ang wala mahakot sa dalan Sikatuna nga sakop sa Barangay Day-as.

 Gipasabot ni Gualiza nga ang mao nga sitwasyon nahimo kay mga garbage collectors sa barangay wala na motrabaho dihang napilde ang ilang gilabanan nga kapitan.

Matud ni Gualiza nga kun magsinabtanay ra ang mga tawo sigurado nga limpyo ang atong tibuok dakbayan.

Gipasabot ni Gualiza nga bisan og daghan na nga mga garbage trucks ang dakbayan dili gihapon kini malimpyo kun ang mga tawo magpataka lang og labay sa ilang mga sagbot lapas sa oras nga gilatid nga tinglabay. (BANAT NEWS)