DNA test result sa gisunog nga duha ka tawo ipagawas na –CPPO

CEBU, Philippines -  Ipagawas na ang resulta sa Deoxyribonucleic Acid (DNA) test sa mga specimen nga gikuha gikan sa duha ka nangapaig nga babaye ug lalaki sud sa awto nga gisunog nga usa ka Hyundai Santa Fe diha sa Barangay Sabang sa dakbayan sa Danao sa milabay nga bulan.

Si Sr. Supt. Noel Gillamac, ang director sa Cebu Provincial Police Office ug maoy pangulo karon sa Special Investigation Task Group nga dili lang usa nila ipagawas ang facial composite sa uban pang mga suspetsado samtang wala pa nila madawat ang resulta sa DNA samples gikan sa PNP Crime Lab sa Campo Crame.

“Maybe next week naa na, kay, it took time man pud gud (DNA testing),” matud ni Gillamac.

Gimandoan na ni Gillamac ang SITG sa pagkuha pa og dugang ebidensya ug sa pagpangita pa og mga saksi aron mas molig-on pa ang ilang kaso.

“Gusto nako lig-on among kaso nga i-file and not because dunay dinalian,” matud ni Gillamac. Ang task group nakakuha na og duha ka saksi nga posibling makasulti kun unsa gyu’y nahitabo.

Napasakaan na og kasong carnapping ug kidnapping sa miaging semana si Warren Sia nga usa ka car dealer nga matud pa nalambigit sa pagkahanaw sa duha ka Korean nationals nga gituohang mao kadtong nangapaig nga patay’ng lawas.

Ang napasaka nga kaso gibase sa pamahayag sa duha ka saksi ug sa circumstantial evidence nga nakuha sa kapolisan.

Sumala pa sa affidavits sa duha ka saksi, si Sia ang kataposang tawo nga gikahinabi sa mga biktima sa wala pa sila ma-missing niadtong Nobiyembre 12.

Kapin usa ka semana na ang nakalabay, ang SITG mi-implemetar sa search warrant batok sa bodega ni Sia sa Barangay Pakigne sa lungsod sa Minglanilla nga miresulta sa pagka-rekober sa usa ka Mitsubishi Lancer nga gipanag-iya sa usa ka saksi.

Samtang ang Hyundai Santa Fe nga nasunog uban sa duha ka  tawo gipanag-iya usab sa usa ka saksi ug matud pa ang rehistro niini wala pa mabalhin sa lain nga ngalan tungod kay wala pa man maimpas og bayad ang iyang sakyanan. Ang mga saksi pulos usab mga car dealers ug ang mga Koreano nga na-missing hangtud karon  maoy ilang nahimong mga middlemen.

“Ang result sa DNA mao na lang gyud among gipaabot aron ma-confirm namo ang mga ebidensiya nga among nakuha,” matud ni Gillamac. (BANAT NEWS)