Way politika paglaslas sa JO quotas

CEBU, Philippines -  Si Talisay City Administrator John Yre De los Reyes mihimakak nga dunay bulok politika ang paghatag og tag-lima lang ka mga quota sa job order ngadto kang Konsehal Eduardo “Digul” Gullas, III ug kang ex-officio member nga si Raul Cabañero.

Mipasabot si Yre nga wala maatiman ni Digul ang iyang mga JO samtang si Cabañero kinsa kapitan sa barangay Bulacao ug presidente sa Association of Barangay Captain (ABC) sa Talisay walay balaod nga nagmando nga hatagan kini og 50 ka mga quota sa JO.

Matud ni Yre nga matag kapitan sa 22 ka mga barangay sa siyudad gihatagan lang kini og tag-lima ka JO.

Kahinumduman nga si Kongresista Gerald Anthony “Samsam” Gullas, Jr. sa unang distrito sa probinsiya midepensa sa iyang manghod nga nag-eskwela pa kini sa kolehiyo hinungdan nga usahay dili kini makatambong sa sesyon.

Gawas niini nagkanayon usab si Samsam  nga wala makadawat og reklamo ang iyang manghod gikan sa iyang mga JO nga wala sila maatiman.

Matud usab ni Yre nga kung dunay bulok politika ang ilang gibuhat dili unta nila hatagan og Legislative Assistance Fund (LAF) si Digul.

Ang tanang mga konsehal sa dakbayan sa Talisay magdawat kini og P1milyon nga LAF matag usa kanila aron duna silay magamit alang sa mga proyektong ilang ipaimplementar.

Kahinumduman nga gikan sa tag-50 ka mga quota sa JO karon ang matag konsehal duna na lang kini 20 ka quota matag usa gawas nila ni Digul ug Cabañero.

Dugang ni Yre nga gikan sa kapin sa 2,000 ang siyudad duna na lang kini karon 1,400 nga JO.  (BANAT NEWS)